ភ្នំពេញ៖ សកម្មជនប្រឆាំងលោក អៀ ចាន់ណា ក្រោយពីដឹងកំហុស និងបានសុំទោសនាយករដ្ឋមន្ត្រីដោយបានចេញវីដេអូកាលពីល្ងាចមិញ ពេលនេះបានចេញពីពន្ធនាគារទៅដល់ផ្ទះហើយ ក្រោយសម្ដេចតេជោទទួលយកការសុំទោស និងបានបញ្ជាដល់រដ្ឋមន្ត្រីយុត្តិធម៌ជួយអន្តរាគមន៍ឲ្យបាននៅក្រៅឃុំ។

លោក អៀ ចាន់ណា បានថតវីដេអូមួយដែលបង្ហាញពីលោកកំពុងស្ថិតនៅក្នុងផ្ទះនិងបានអរគុណដល់សម្ដេចតេជោដែលបានជួយឲ្យលោកបាននៅក្រៅឃុំ។

លោក អៀ ចាន់ណា ត្រូវបានសមត្ថកិច្ចកម្ពុជាចាប់ខ្លួនកាលពីថ្ងៃទី៣០ ខែឧសភា ឆ្នាំ២០២២ នៅផ្សារទំនើបអ៊ីអន២ ស្ថិតក្នុងខណ្ឌសែនសុខ រាជធានីភ្នំពេញ បន្ទាប់ពីវិលចូលប្រទេសកម្ពុជា ហើយបានចូលរួមធ្វើយុទ្ធនាការឃោសនាបោះឆ្នោតជាមួយបក្សភ្លើងទៀននៅខេត្តតាកែវ កាលពីថ្ងៃទី២៧ ខែឧសភា ឆ្នាំ២០២២។

លោកត្រូវបានសមត្ថកិច្ចបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស ក្រោមការចោទប្រកាន់ពីបទ «រួមគំនិតក្បត់» ពាក់ព័ន្ធរឿងដំណើរវិលត្រឡប់លើកទីពីររបស់អ្នកស្រី មូរ សុខហួរ កាលពីដើមឆ្នាំ២០២១៕